पोखरा। मनाङ (ख) बाट स्वतन्त्र चुनाव जितेर एकीकृत समाजवादी प्रवेश गरेका राजीव गुरुङ (दीपक मनाङे) गण्डकी प्रदेशको भौतिक पूर्वाधार तथा यातायात बन्ने भएका छन् । मनाङेले आईतवार मात्र समाजवादी त्यागेर स्वतन्त्र सांसद कायम गर्न प्रदेश सभा सचिवालयलाई अनुरोध गरेका थिए ।
उनलाई मुख्यमन्त्री सुरेन्द्रराज पाण्डेले समाजवादी पार्टी परित्याग गरेको २४ घण्टा नबित्दै भौतिक पूर्वाधार तथा यातायात मन्त्री बनाउने तयारी गरेको बुझिएको छ । मनाङेको शपथको तयारी गर्न प्रदेश प्रमुखको कार्यालयलाई जानकारी गराइसकिएको छ ।
मनाङे चौथो पटक गण्डकीको मन्त्री बन्न लागेका हुन् । यसअघि उनी नेकपा एमालेका पृथ्वीसुब्बा गुरुङ नेतृत्वको सरकारमा दुई पटक र कांग्रेसका कृष्णचन्द्र नेपालीको सरकारमा एक पटक युवा तथा खेलकुदमन्त्री बनेका थिए ।
भौतिक पूर्वाधार तथा यातायात मन्त्रीमा यसअघि माओवादी केन्द्रकी सुशीला सिम्खडा मन्त्री थिइन् । केन्द्रमा समीकरण फेरिएपछि मुख्यमन्त्री पाण्डेले माओवादी मन्त्रीलाई बर्खास्त गरेर भौतिक र सामाजिक विकास मन्त्रालय आफैसँग राखेका थिए ।
