कालिकोट। कालिकोटको तिलागुफा नगरपालिका -१० रानावाडामा बम विस्फोट हुँदा २ जना बालिकाको मृत्यु भएको छ।
आज बिहान करिब ८ बजे रानावाडास्थित कोदोबारीमा बम विस्फोट भएको जिल्ला प्रहरी कार्यालयले जानकारी दिएको हो।
तिलागुफा नगरपालिका-१० बस्ने ४ वर्षीया झरना थापा र सोही ठाउँकी ४ वर्षीया सरस्वती रानाको मृत्यु भएको जिल्ला प्रहरी कार्यालयका डिएसपी जयश्र्वर रिमालले जानकारी दिए ।
उनका अनुसार झरनाको घटनास्थलमै मृत्यु भएको थियो भने सरस्वतीको सुर्खेतस्थित प्रादेशिक अस्पतालमा उपचारको क्रममा ११:४०मा मृत्यु भएको थियो।
घटनामा तीन जना गम्भीर घाइते समेत छन्। घाईते हुनेहरूमा सोही ठाउँका ७ वर्षीय कमल थापा, ५ वर्षीया मुस्कान थापा र ३ वर्षीया दर्शना राना छन।उनीहरूलाई हेलिकप्टरबाट उपचारको लागि सुर्खेतमा पठाइएको छ।
डिएसपी रिमालका अनुसार विस्फोट भएको बम नयाँ हो वा पूरानो भन्ने अनुसन्धान भइरहेको छ।