काठमाडौ । गत बिहीवार बसेको मन्त्रीपरिषद्ले स्वीकृत गरेसंगै भोलीबाट धरहरा चढ्न पाइने भएको छ ।
यसअघि परीक्षणका रूपमा निःशुल्क खुला गरिएको धरहरा चढ्न अब भने स्वदेशी नागरिकलाई प्रतिव्यक्ति २ सय रुपैयाँ शुल्क लाग्ने भएको छ।
त्यसैगरी विशिष्ट संरचना सञ्चालन तथा व्यवस्थापन विकास समिति (गठन) आदेश, २०८१ बमोजिम सार्क राष्ट्रबाट आउने पर्यटकलाई प्रतिव्यक्ति रु पाँच सय र सार्क राष्ट्र बाहेकका पर्यटकलाई प्रतिव्यक्ति रु एक हजार शुल्क लाग्ने भएको छ ।
स्वदेशी नागरिकको हकमा भने विद्यार्थी, ज्येष्ठ नागरिक, बालबालिका र अपाङ्गता भएका व्यक्तिले धरहरा चढ्दा लाग्ने शुल्कमा ५० प्रतिशत छुट पाउने छन् ।
यस्तै, धरहरामा पार्किङ गर्दा चार पाङ्ग्रेलाई प्रतिघण्टा रु २० र दुई पाङ्ग्रेलाई रु १० तोकिएको छ।
त्यस्तै धरहरा स्तम्भमा राष्ट्रिय महत्त्वका विज्ञापन (व्यावसायिकबाहेक) गर्न प्रतिघण्टा रु पाँच हजार, धरहरा परिसरमा व्यावसायिक भिडिओ छायाङ्कन गर्न प्रतिघण्टा रु पाँच हजार र फोटोग्राफीका लागि प्रतिघण्टा रु एक हजार शुल्क निर्धारण गरिएको छ।
सहरी विकास मन्त्रालयले राखेको उक्त प्रस्ताव गत बिहीबार बसेको मन्त्रिपरिषद् बैठकले स्वीकृत गरेसंगै यो शुल्क तय भएको मन्त्रालयले जनाएको हो।
