रामेछाप । भौतिक पूर्वाधार तथा यातायात मन्त्री देवेन्द्र दाहालले गत असोज ११ र १२ गतेको मुसलधारे बर्षासंगैको बाढीले बगाएको बिपी राजमार्गको १२ किलोमिटर सडक बनाउन जापान सरकारलाई अनुरोध गर्ने बताएका छन् । यो राजमार्ग जापान सरकारको सहयोगमा बनेको हो ।
रामेछाप र सिन्धुली जोड्ने सुनकोशी नदी माथि खुर्कोटको बेलीब्रिज निर्माणमा संलग्न नेपाली सेना लगायतलाई धन्यवाद दिन मंगलबार मन्थली नगरपालिकाले खुर्कोटमा आयोजना गरेको कार्यक्रमका बोल्दै मन्त्री दाहालले सरकारले गरेको काममा जस लिन हानाथाप गर्न आवश्यक नरहेको बताएका हुन् ।
गत असोज १२ गतेको बाढीले बगाएको खुर्कोटको पुलमा बेलीब्रिज राख्ने काममा सबैको भूमिका रहेको दाहालले स्पष्ट पारेका छन् । उनले सत्तारुढ दलका नेता कार्यकर्ताहरू एक आपसमा जुधेर होइन, मिलेर काममा लाग्नु पर्ने बताएका छन् । ‘यो सरकार काम गर्नका लागि बनेको सरकार हो, यो सरकारले आफ्नो गतिमा काम गरिरहेको थियो, काम गर्दा गर्दै बाढी पहिरोले एउटा वितण्डा मच्चायो र एउटा नयाँ परिस्थितिको सिर्जना गरिदियो’, उनले भने।
उनले सरकारका प्राथमिकता अब केही परिवर्तन भएको बताएका हुन् । यस पटकको बाढी पहिरोले सडक र पुललाई बढी क्षति पुर्याएको उनले बताएका छन् । भौतिक पूर्वाधार मन्त्रालय अन्तर्गत नै साँढे ६ अर्ब रुपैँया बढीको क्षति भएको दाहालले जानकारी दिएका हुन् ।
त्यसको पुनर्निर्माण लागि १५ अर्ब ३३ करोड बढी रकम लाग्ने प्रारम्भिक अनुमान गरिएको उनले बताएका छन् । त्यसैले अब सरकारले प्राथमिकता तोकेर काम गर्नुपर्ने स्थिति रहेको उनले स्पष्ट पारेका छन् ।
दाहालले बाढीले क्षति पुर्याएका संरचना मध्ये पहिलो प्राथमिकता खुर्कोटको पुललाई दिएर निर्माण गरेको बताएका छन् । बिपी राजमार्ग निर्माणको कामलाई सरकारले पहिलो प्राथमिकतामा राखेको उनले जानकारी दिए । बिपी राजमार्ग १२ किलोमिटर पुरै बगाएको बताउँदै उनले सडक निर्माणको लागि जापान सरकारलाई अनुरोध गरिने र उसले नगरे सरकारले आफैँले गर्ने उनले स्पष्ट पारेका छन् ।
बेलीब्रिज बनेका ठाउँमा स्थायी पुल निर्माणको काम अघि बढाउने उनले बताए । अब तत्कालको प्राथमिकता सुनकोशी नदीकै फोक्सिङटारको पुल निर्माण गर्ने रहेको उनले जानकारी दिए । त्यस्तै ताप्लेजुङको हेवाखोला पुल सरकारको तेस्रो प्राथमिकतामा रहेको उनले बताएका छन् ।
जनताको जिम्मा सरकारले लिनु पर्ने बताउँदै दाहालले सरकारले बाढी पहिरो प्रभावितको उद्धारको काम सकिएकोले अब राहत र पुनर्स्थापनाको काम हुनु पर्नेमा जोड दिएका छन् । अहिले अस्थायी पुनर्स्थापनाको काम भइरहेको बताउँदै उनले अब स्थायी पुर्नस्थापनाको काम अघि बढ्ने बताएका छन् ।
अब आवास निर्माण गर्दा नदी र खोला किनारमा आवास बनाउन नहुने पाठ सिकिएको दाहालले बताएका छन् । जोखिमपूर्ण ठाउँमा बस्ती बसाउन नहुनेमा उनले जोड दिएका छन् । सरकारले नागरिकलाई रोजगारसँग जोडेर पुनर्स्थापनाको काम अघि बढाउने दाहालले जानकारी दिए ।
