काठमाडौ । लामो समयदेखि आनदोलन गर्दै आएको मेलम्ची बाढी पीडित संघर्ष समितिको आन्दोलन स्थगित भई आज मेलम्चीको पानी सुन्दरीजल पठाइँदैछ ।
सोमवार खानेपानी मन्त्री प्रदीप यादव सहित मेलम्ची पुगेको टोली र आन्दोलनरत मेलम्चीका संघर्ष समितिबीच वार्ता भएसंगै आजदेखि मेलम्चीको पानी सुन्दरीजल पथान्तरण गर्न लागिएको हो ।
हेलम्बु गाउँपालिकाको मेलम्चीमा भएको वार्तामा संघर्ष समितिका जायज मागहरु सम्बोधन गर्ने सहमति भएसंगै आज मङ्गलबार मेलम्चीको पानी सुन्दरीजलमा पथान्तरण गरिने मेलम्ची खानेपानी विकास समितिका कार्यकारी निर्देशक रत्न लामिछानेले जानकारी दिए ।
वार्तामा काठमाडौं उपत्यका खानेपानी लिमिटेडले बिक्री गरेको मेलम्चीको पानीबाट प्राप्त हुने रकमको २५ प्रतिशत हेलम्बु गाउँपालिकाको विकासका लागि उपलब्ध गराउनुपर्ने मागमा मन्त्रालय र सरोकारवाला निकायहरुबीच छलफल गरी तीन महिनाभित्र टुङग्याउने सहमति भएको छ । साथै हेलम्बु मेलम्ची एकिकृत जलाधार तथा क्षेत्र विकास परियोजना गठनको प्रस्ताव यथाशिघ्र मन्त्रिपरिषदमा प्रस्ताव पेश गरी कार्यन्वयनमा खानेपानी मन्त्रालयले पहल गर्ने सहमति छ ।
संघर्ष समितिको मागअनुसार आयोजना पुनःर्निर्माण तथा स्थानीय सडक निर्माणको लागि भौतिक पूर्वाधार तथा यातायात मन्त्रालय मार्फत अर्थ मन्त्रालयमा स्रोत सहमति लिएर अबको तीन महिनाभित्र बहुवर्षीय ठेक्का प्रक्रिया अगाडि बढाउने घर पूर्णरुपमा क्षति भएका बाढी पीडितहरुलाई तत्काल घर पुनः निर्माण गर्न २० लाख उपलब्ध गराउनका लागि विशेष पहल गर्ने पनि सहमति भएको छ । यसअघि सरकारले ३ लाख उपलब्ध गराएको थियो ।
हेलम्बु गाउँपालिका भवन निर्माणका लागि थप रकमसहित स्रोत सुनिश्चितताका लागि खानेपानी मन्त्रालयमार्फत अर्थ मन्त्रालयमा एक हप्ता भित्र प्रस्ताव पेश गर्ने र प्रशासनिक भवन निर्माणको जिम्मेवारी मेलम्ची खानेपानी विकास समितिले लिने पनि सहमति छ । यस आर्थिक वर्षमा रु एक करोड बजेट विनियोजन भएको थियो ।
सहमतिअनुसार तत्काल गर्नुपर्ने कामहरु अगाडी बढाउने र दीर्घकालमा गर्नुपर्ने काम आगामी आर्थिक वर्षहरुमा प्राथमिकताका आधारमा आयोजनाहरु समावेश गरी कार्यान्वयन गर्न पहल गर्ने कार्यकारी निर्देशक लामिछानेले बताए ।
मन्त्रालयसँग भएको सहमतिसँगै संघर्ष समितिका आन्दोलनका सबै कार्यक्रम सोमबारदेखि नै स्थगित भएका छन्।
