काठमाडौ । झ्याप्लेखोलामा पहिरो गएर पृथ्बी राजमार्ग अबरूद्ध भएपछि काठमाडौबाट नुवाकोट हुँदै पोखरा जान लागेको माइक्रोबस छहरे-टोखा सडक खण्डअन्तर्गत नुवाकोटको शिवपुरी गाँउपालिका-७ मा आज माइक्रोबस दुर्घटना हुँदा १२ जना यात्रु घाइते भएका छन् । घाइतेमध्ये दुई जनाको अवस्था गम्भीर रहेको बुझिएको छ ।
जिल्ला प्रहरी कार्यालय नुवाकोटका अनुसार काठमाडौँबाट नुवाकोट हुँदै पोखरा जाँदै गरेको माइक्रोबस आज सोमवार अपरान्ह एक बजे अदुवारीमोडमा अनियन्त्रित हुँदा सडकबाट अन्दाजी ५० मिटर तल पुगेको घटनास्थल पुगेका प्रहरीले जानकारी दिएका छन् ।
प्रहरीका अनुसार दुर्घटनास्थलमा ठूलोभीर भएपनि मौवाको रुखमा गाडी अड्किएकाले ठूलो क्षति हुनबाट जोगिएको हो।
उक्त गाडीमा १८ जना सवारमध्ये गम्भीर दुईसहित १२ जनालाई उपचारका लागि काठमाडौं पठाइएको छ। पृथ्वीराजमार्ग कम्पनी प्रा. लि.मार्फत सञ्चालित ग १ ख ४५३५ नम्बरको माइक्रोबस धादिङको विभिन्न स्थानमा गएको पहिरोका कारण काठमाडौंको टोखाबाट नुवाकोट हुँदै धादिङको गल्छी निस्केर पोखरा जाने क्रममा नुवाकोटमा दुर्घटनामा परेको हो।
