काठमाडौ । माओवादीले प्रतिनिधिसभामा ‘हिंसा’ शब्द नसच्याएसम्म बैठक अवरुद्ध गर्ने चेतावनी दिएपछि प्रतिनिधि सभाको बैठक सुरूहुनुभन्दा दुईघण्टा अगाडी सभामुख देवराज घिमिरेले सबै दलका प्रमुख सचेतकहरूलाई छलफलमा बोलाएका छन् ।
सभामुख घिमिरेले आज आइतबार बिहान ११ बजे सिंहदरबारमा राष्ट्रिय दल (नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टी )का प्रमुख सचेतक/सचेतकलाई बैठकका लागि बोलाएका छन् ।
आइतबार दिउँसो १ बजे प्रतिनिधिसभा बैठक बोलाइएको छ । प्रमुख प्रतिपक्ष दल नेकपा माओवादी केन्द्रले प्रतिनिधिसभा बैठक अवरोध गर्ने जनाएपछि सभामुख घिमिरेले दलहरूलाई छलफलका लागि बोलाएका हुन् ।
सभामखु घिमिरेले भदौ १२ को प्रतिनिधिसभा बैठकमा एमाले सांसद योगेशकुमार भट्टराईले प्रयोग गरेको ‘माओवादीको सशस्त्र हिंसा’ भन्ने शब्द असंसदीय नभएको रुलिङ गरेका थिए ।
योसंगै माओवादी संसदीय दलको शुक्रबार बसेको बैठकले ‘माओवादी जनयुद्ध’ लाई अपमान गर्न खोजिएको उल्लेख गर्दै सभामुखले ‘हिंसा’ भन्ने शब्द असंसदीय नभएको भन्ने निर्णय नसच्याएसम्म बैठक चल्न नदिने निर्णय गरेको थियो ।
