सिन्धुपाल्चोक । स्थानीयले सिन्धुपाल्चोकस्थित भोटेकोशी नदीमा गाडी खसेको भनेपछि अहिले हो होइन एकिन गर्न नेपाल प्रहरी, नेपाली सेना र सशस्त्र प्रहरीको टोली क्रेनको सहायताले नदीमा गाडी खोज्ने काममा जुटेको छ ।
‘टायर देखिएको भनेर खबर आएपछि सुरक्षाकर्मीहरूले खोजी थालेका छन्,’ प्रहरीले भनेका छन्, ‘भारी वर्षाका कारणले भोटेकोशीको बहाव एकदमै बढेको छ ।’ क्रेनमा झुण्डिएर खोजी गर्ने प्रयास गरिरहेको भए पनि खोज्न कठिन भएको प्रहरीले बताएको छ ।
सिन्धुपाल्चोकको बाह्रबिसे नगरपालिका–६ स्थित भोटेकोशी नदीमा गाडी खसेको हो । गाडी नदीमै खसेको हुनाले कुन गाडी हो भन्नेसम्म यकिन भइनसकेको उनले बताएका छन् ।
प्रहरीका अनुसार अहिलेसम्म बोलेरो गाडी हो भन्ने मात्रै आएको छ एकिन हुन भने सकेको छैन , त्यसमा मान्छे कति जना, कहाँबाट आएको, नम्बर कति हो केही पनि खुल्न नसकेको जनाएको छ।
