काठमाडौ । लगानी बोर्डको प्रमुख कार्यकारी अधिकृत (सीईओ) मा ललितपुरका सुशील ज्ञवाली नियुक्त भएका छन्।
बिहीबार सिंहदरबारमा बसेको मन्त्रिपरिषद् बैठकले ज्ञवालीलाई सीईओ नियुक्त गरेको हो। यसअघि उनी राष्ट्रिय पुनर्निर्माण प्राधिकरणका सीईओ भएका थिए।
ज्ञवाली राष्ट्रिय योजना आयोगको सदस्य पनि नियुक्त भएका थिए। लगानी बोर्डको प्रमुख कार्यकारी अधिकृत सिफारिस समितिको सचिवालयले सूचीकृत भएका ५ जनाको नाम संक्षिप्त सूचीमा प्रकाशित गरेको थियो। समितिले उनीहरुसँग मंगलबार अन्तर्वार्ता लिएर ३ जनाको नाम मन्त्रिपरिषदमा पठाएको थियो। तिनै तीनजना मध्येबाट मन्त्रीपरिषद्ले ज्ञवालीलाई नियुक्त गरेको हो ।
सिफारिस समितिले ज्ञवालीसहित विष्णुप्रसाद भट्टराई, रघुराज काफ्ले, रामदेव यादव र भीष्मराज ढुंगानालाई संक्षिप्त सूचीमा सूचीकृत गरेको थियो। लगानी बोर्डको सीईओ बन्न ८ जनाले आवेदन दिएका थिए।
यसअघि सीईओ सुशील भट्ट चार वर्षे कार्यकाल पूरा गरी साउन २१ मा बिदा भएका थिए। गत साउन २८ मा समितिले सार्वजनिक सूचना प्रकाशित गरी आवेदन माग गरेको थियो।
