काठमाडौ । गत सोमवार मध्यरातमा नेपाली कांग्रेस र नेकपा एमालेबीच भएको सहमतीलाई लिएर सरकार गठनको सम्बन्धमा विभिन्न अड्कल बाजी भईरहेको अबस्थामा नेपाली काङ्ग्रेसले भने सोही सहमति अनुसार संविधानको धारा ७६ (२) बमोजिम नै नयाँ सरकार बन्ने दावी गरेको छ।
आज शनिबार संसद भवन नयाँ बानेश्वरमा बसेको कांग्रेस संसदीय दलको बैठकले सहमति अनुसार अब बन्ने नयाँ सरकारको नेतृत्व एमाले अध्यक्ष केपी शर्मा ओलीले गर्ने र त्यस्तो सरकार संविधानको धारा ७६ (२) बमोजिम गठन हुने दावी गरेको हो।
बैठकले नेपाली काङ्ग्रेस एमालेसँग भएको सहमति कार्यान्वयनमा दृढ रहेको निष्कर्ष निकालेको कांग्रेस मुख्य सचेतक रमेश लेखकले जानकारी दिए।
त्यस्तै बेैठकले प्रधानमन्त्री प्रचण्डले २८ गते विश्वासको मत लिने पत्र संसद सचिवालयमा दर्ता गरेको अवस्थामा उक्त प्रस्तावको बिपक्षमा उभिने निर्णय गरेको पनि लेकले बताए।
लेखकले राष्ट्रिय हितको रक्षा, भ्रष्टाचार नियन्त्रण गर्दै सुशासन कायम गर्ने, शिथिल अर्थतन्त्रलाई क्रियाशिल गर्ने, संविधान कार्यान्वयनका सवालमा देखिएका सबल र कमजोर पक्षको समिक्षा गरेर संविधानको आवश्यक संशोधन गर्ने सवालमा नयाँ सरकार दृढतापूर्वक लाग्ने विश्वास व्यक्त गरे।
