काठमाडौ । वेस्ट इन्डिजमा भएको आइसीसी टी-२० विश्वकपको फाईनल खेलमा दक्षिण अफ्रिकालाई हराएसंगै भारतले दोस्रो पटक विश्वकपको उपाधि जितेको छ । यश भन्दा अगाडी सन् २००७ मा भारतीय क्रिकेट टोलीले उपाधि हात पारेको थियो ।
वेस्ट इन्डिजको ब्रिजटाउनस्थित केङ्ग्सिङ्टन ओभलमा शनिबार राति भएको खेलमा भारतले दक्षिण अफ्रिकामाथि ७ रनको जित निकाल्दै सत्र बर्षपछि पुन: टी–२० विश्वकप उपाधि जितेको हो।
उपाधिसँगै भारतले अपराजित रहेर विश्वकपको उपाधि जित्ने एक्लो टोली को कीर्तिमान समेत बनाएको छ । यो विश्वकपका सबै खेल भारतले जितेको थियो ।
पहिलो पटक सन् २००७ मा भएको पहिलो विश्वकप भारतले जितेको थियो। २००९ को विश्वकप पाकिस्तानले २०१० र २०२२ को उपाधि इङ्ल्याण्डले उचालेको छ। सन् २०१२ र २०१६ को उपाधि वेष्ट इण्डिजले तथा २०१४ को उपाधि श्रीलंकाले र २०२१ को उपाधि अष्ट्रेलियाले जितेको थियो।
१७७ रनको विजयी लक्ष्य पछ्याएको दक्षिण अफ्रिकाले २० ओभरमा ८ विकेट गुमाउदै १६९ रन बनायो । दक्षिण अफ्रिका हेनरिक क्लासेनले २७ बलमा २ चौका र ५ छक्कासहित सर्वाधिक ५२ रन बनाए । बलितर्फ भारतका हार्दिक पान्ड्याले तीन, अर्शदीप सिंह र जसप्रित बुमराहले दुईदुई तथा र अक्षर पटेलले एकएक विकेट लिए ।
पहिले ब्याटिङ गरेको भारतले निर्धारित २० ओभरमा ७ विकेटको क्षतिमा १७६ रन बनाएको थियो । भारतको लागि विराट कोहलीले ७६ रन जोडे । उनी ५९ बलको सामना गरेर २ छक्का र ६ चौका प्रहार गरेर आउट भएका थिए । अक्षर पटेलले ३१ बलमा १ चौका र ४ छक्का हानेर ४७ रन बनाए। शिवम् दुबेले १६ बलमा ३ चौका र १ छक्का हानेर २७ रन जोडे।
