काठमाडौ । नेकपा एमालेका महासचिव शंकर पोखरेल सवार स्कारपियो जीप पल्टिएको छ ।
दैलेखमा आयोजित पार्टीको जिल्ला अधिवेशन उद्घाटनका लागि जाँदै गर्दा महासचिव पोखरेल चढेको म १ च ३६९ नम्बरको स्कारपियो जिप शनिबार दिउँसो दैलेखको डुंगेश्वर गाउँपालिकाको चुप्रा बजार नजिक पल्टिएको हो।
जीप पल्टिए पनि महासचिव पोखरेलसहित जीपमा सवार सबै नेता सुरक्षित रहेको एमालेका उपमहासचिव विष्णु रिमालले जानकारी दिएका छन्।
‘एउटा अकल्पनीय क्षति हुनबाट जोगिएको भयानक दुर्घटना’, उपमहासचिव रिमालले शनिबार पल्टिएको जिपको तस्बिरसहित सामाजिक सञ्जाल फेसबुकमा लेखेका छन्, ‘हिजो (शनिबार) दैलेख जाने क्रममा एमाले महासचिव शंकर पोख्रेल सवार जिप दुर्घटनामा पऱ्यो। यो डरलाग्दो दुर्घटनाबाट मानवीय क्षति भएको छैन। सबै सुरक्षित हुनुहुन्छ।’
